واطيعوا الله واطيعوا الرسول واولي الامر منكم

كان ياما كان …يا ساده ياكرام … من سالف العصر والافلام … قصه وليها مغزى جميل   … بطلها عمده ظالم و بخيل … نفسه في عزوه … بس مستحيل … و مراته رخره بخيله … و برضه زيه عليله … نفسها تخلفللو ولد … بس ماباليد حيله … العمده و اسمه عتمان … كان جشع وطماع … و مراته الست حفيظه … سيئة الطباع  … الشيخ مبروك و دا ظل  العمده …  بدل الوصفه جابللو الف … و الست حفيظه عالاوليا لفت لف …  بس  العمده خلاص زهق … و عشان كده تلاقيه دايما مبوز … شار عليه الشيخ مبروك يجوز … و عشان حفيظه لا تتعصب و لا تتنرفز … قالولها دي مش هتقعد … دي بهيمه تعشر وتولد … و الواد يبقي باسمك … ربيه و وخديه علي طبعك … صدقت الهبله و ابتدت تخطبله … بس مين … هو عينه علي ست الحلوين … فلاحه صغار و عليها الطلا … بس دي مرات ابو العلا … و ده ايش يكون … ده لا حول له و لا… بالامر يطلقها و يبقي مفيش مشكله … العمده راح لابو العلا يدحلب … حط ف ايده قرشين … و وعده بزيادة المرتب …و ابو العلا بيسمع و هو مستغرب … و بيسأل نفسه … ليه العمده بانت كرماته … اه … مطلوب منه يطلق مراته … و لو ماوافقش … تبقي دي نهايه حياته … و تهم بالقتل تتلفق … و نيابه  جاهزه بالحكم  قبل ما تحقق … و الغلبان هيروح في شربة ميه … مراتو قالتللوا نروح بلد تانيه … يدوب لم عياله و حتتين العفش … كلاب العمده قفشوه قفش … و البلد اتملت اشاعات … و كلام عن سرقه بالميات … و محدش فكر يسأل الحقيقه ايه … و ف لحظه  ابو العلا  بقي جاني … مع انو مجني عليه … فاطمه قالت و ايش بعدها … مفيش غير اني اطلق … و انت تفضل لعيالك و برزقهم ترزق … و متخافش عليا … انا معايا ربنا … هو بالغلابه احن و ارفق … و ابو العلا لسه مش مصدق … ساقوه بالغصب علشان يطلق … بس هو يا ولداه … مش قادر ينطق … و العمده واقفلوا و حالف ميت يمين … لو ما نطق ليرميه اسفل سافلين … و كلاب العمده واقفينلوا مسلحين … وراهم الشيخ مبروك راجل الدين … واقف يتفرج  … و يبرر جبروت العمده بايتين … ابو العلا صرخ في شرع مين … بس وحداني و هيروح منهم فين … غصب عنه … و بلاكراه رمي اليمين … قام العمده مد ايده بقرشين … بس ابو العلا مش هيندبح مرتين … بص للعمده بصة مقهور ذليل … و بكل اسي قالو … حسبي الله و نعم الوكيل … بس العمده … جبله و مابتفرقش معاه … حتي شرع ربنا بيتحداه … ف ثانيه فوت شهور العده … و كتب كتابه … و ابتدي يعد العده … و بعت العروسه للبندر تشتري الجهاز … و هناك زارت الاوليا … و عرفت فين الملاذ … شيخ تقي … ورع … قاللها مفيش اكراه لا فالطلاق … و لا في الجواز … و اتزفت فاطمه راكبه التختروان … و العمده في داره فرحان … ماهو النهارده سيد العرسان … اما الست حفيظه العنيده … كانت الصدمه عليها شديده … و الدايه نظيمه جايبلها وصفه جديده … لازم تنام تحت القطر … لجل ما ينفك العمل .. و يزول السحر … كل ده والعمده في داره هايص … حبه … و جايه ست العرايس … بس اللي جت هي حفيظه … متغاظه منه غيظه … ندهت عليه من باب العكننه … الليلادي ليا انا … عيب يا حفيظه … الليالي جايه كتييير … الليله … هي حبكت … ايوه حبكت … و حلفت بالطلاق ما ها تسكت … لو ما ساب مقصوفة الرقبه تتخمد لوحدها … أل يعني عشان تثبت انه لسه بيحبها … و العمده اتلجم و مقدرش يفلفص … بس ساب حفيظه تهري و ترفص … ياريت القطر كلها و كنا  نخلص … و عشان ربنا بيسلط ابدان علي ابدان … كان ده من حظ ابو العلا الغلبان … بقي عريس تاني … و خد مراته بالاحضان … و هي عاهدته … عمر ضفرها لغيره ما هيبان … و ابتدت كل ليله تتحجج … و تتهرب من العمده  باستمرار … و تروح لجوزها و في نفسها … واخده قرار … و لما الحمل بان عليها … الناس حسدتها … و قالت كل ده هايبقي ليها … و ياريت العمده ينصفنا … لجل ما ندعي له يتنيها … و الكل للعمده  كان فرحان … الا هو شارد و سرحان … اللي يقول م الفرحه … و اللي يقول دا علي وش جنان … ماشي يضرب اخماس في اسداس … ومش عارف يوصل لحل … البنت المفعوصه دي حطت راسه في الوحل … وطول ما هو ماشي … يكلم روحه … واخيرا وقع اتشلّ … وفاطمه عايشه في داره … ويوم عن يوم بيبان الحمل … وضرتها يا حفيظ مليانه منها غلّ … كل شويه خناقه وضرب وركل … بس ربنا دايما فوق الكل … شايف الظلم … وقادر يحقق العدل … وعلشان فاطمه ف يوم نار الظلم حرقتها … طلعت اصيله و منسيتش بلدياتها … في كل موسم تزكي عن عينها و عافيتها … راح لها فرج الاعرج نصفته … ورجعت لام نزهه جاموستها …. و العمده راقد و مش قادر يقوم … المرض بيزيد عليه يوم بعد يوم … و لما شرف ولي العهد … العمده مات في نفس اليوم … و مخدش معاه … لا اطيان و لا مال و لا حتي هدوم … هما يدوب مترين … و سبحانه من يدوم … و الناس بره الدار عاملين لمه و زحمه … و مفيش حد هاين عليه … يطلب له الرحمه … زي ما يكونوا ما صدقوا … تنزاح الغمه … و جه ابو العلا يشوف ابنه … و في حسنه يتأمل …. بيضرب كف بكف … ولسان حاله بيقول …. يمهل و لا يهمل

مناجاه

اللهم ياسبوح … ياقدوس … يارحمن … يامنان … فرج لنا بالفضل والاحسان … انك رحمن منان .

دعاء

ربنا …. يا ذا التجلي و الجلال …. يا خفي اللطف…. يا رب النوال ……
هب لنا الصالح… من عمر ومال….. و ابعد الاهوال عنا …..و الخطوب ……

لطيفة النادى

لطيفة النادى اول فتاة مصرية تفوز في سباق الطيران الدولي عام 1933 . التحقت لطيفة النادى في 18 يونيو عام 1933 بمدرسة شركة مصر للطيران وتمكنت من الطيران بمفردها بعد 13 ساعه طيران فقط . ثم اتقنت الطيران فى 67 يوما فقط .وفي اكتوبر 1933 حلقت لطيفة النادى في الجو فكانت اول مصرية تعلمت الطيران وحصلت علي شهادة دولية تعادل شهادة احسن الطيارين . واكد مدربها انها تتميز بالجراة وقوة الملاحظه وسرعة الفهم فشجعها بتقديم كل التسهيلات لكي تكون طياره بارعه… حيث فازت بالمرتبة الاولى فى السباق الدولى الرسمى الذى اقيم بمصر واشتركت فيه عديد من الدول فكانت اول فتاه مصريه تفوز في سباق دولى على الفتاه الاوربيه.

شكرا مستر اوباما thank you mr obama

مرحبا بك فى القاهره ارض الحضاره  الزاخره  شرفت موطنك  الثاني وتشرف بك ,  تجمع الكل يصغى لك  وقلت

قولا اسرا

جواز عتريس من فؤاده باطل

كان ياما كان … ياساده يا كرام….. في سالف العصر … والافلام… بنت صغيره اسمها فؤاده ….من يومها شجاعه وسداده …. حبت ولد صغير اسمه عتريس … وحيد جده حليف ابليس …. عاهد فؤاده من صغره ….. يفضل قلبه ابيض طول عمره… لكن جده شراني… رباه عالاعتساف … رافض يكون من اهل الانصاف …. وقبل ما يموت حلفه. … في الشر لازم يخلفه……وياخد بتاره من اللي قتله …. حتي لوكانوا كل اهله…. مسك البندقيه ومع اول رصاصه … نسي عهده بمنتهي الخساسه …. مشي في طريق الظلم والدهاشنه خافوا …. .جف الزرع والضرع وبرضه خافوا …. طمي الارض الطرى بئي جبس… والدهاشنه خايفه وبطاطي الراس … لحد البنت فؤاده الشجاعه … مافتحت الميه تروي الزراعه … جه عتريس وعصابته يشوفوا ايه الحكايه … وقفت فؤاده مستنيه النهايه … صوب بندقيته ناحيتها بكل نداله … وهو اللي كانت حالته حاله ….بصة التحدى فى عنيها والعناد …شللت ايده على الزناد… قام فكر ازاى يكسرها عشان هزاءته … راح لابوها عشان تبئي في عصمته … الاب خاف و قال , لو قلت لا هايقتلني وبرضه هيتجوزها … قام فكر في حيله خايبه وابتدى ينفذها  … عزم صحابه والماذون من غير ما يقوللهم ليه … وهما من كتر الخوف و بالتزوير جوزوها ليه … لكن هي برضه لم تتهدد … واتزفت لابسه اسود فاسود … ولما اتقفل عليهم باب … قالت له عالخبر الهباب … انا مش مرتك لاني ما وافئتش … قاللها في ماذون وشهود … قالت بس انا ماوافئتش … سال الماذون والشهود … قالوا خوفنا … قاللهم يعني ايه … قالوا سامحنا …حرقلهم ارضهم …موتلهم زرعهم… الشيخ ابراهيم عرف , ودا حامي حقوق ربنا … راح لابوها و قاللوا فؤاده لازم ترجع وسطنا … الاب برضه خاف , لكن الحق عمره ما يخاف … الشيخ نادى باعلي صوت , الجوازه باطله … عتريس غرقله ارضه , الجوازه باطله … قتلله ابنه فيوم فرحه … الجوازه باطله … شال جثة ابنه ومشي يكتب عالحيطان … جواز عتريس من فؤاده باطل … وعشان كان لازم يجي يوم و الدهاشنه تقوم وتناضل … خرجوا كلهم ورا جثة العريس حاملين المشاعل … خاف عتريس الجبار , وقال لرجالته اقتلوا الدهاشنه… لكن هما كانوا جبنا , وقالوا ياللا ننفد بانفسنا … و سابوه لوحده يواجه مصيره … بيته يولع بيه , زى ما ولع في ارض غيره … فالاول فؤاده كانت لوحدها … بس دلوئتي معاها الكل …صحيح في ضحايا وفي حرق وقتل … لكن الحق انتصر … والراس اترفع من بعد الذل .

لماذا طير فى السما

اولا اهلا وسهلا بكم فى مدوننى المتواضعة والتى اتمنى ان تعجبكم واول حاجة عارفة انكم سوف تسالونى لماذا اخترت عنوان المدونة ؟؟
لان الاسم فيه حريه و احساس بالانطلاق بعيدا عن زحمة الارض ومشاكلها فقد تعودت على السماء  بحكم عملي ودايما الاقي فيه صفاء ونفاء مش موجود على الارض. دائما كنت فى صغرى اعشق لون السما وقد حقق الله املى فى ان ارى هذا اللون دائما فتصفو روحى واعود الى عالم الارض سعيدة بعد عناء العمل فارجو ان تتواصلو معى فى مدونتى التى اتمنى ان تعجبكم وتصبح نقطة تلاقى بيننا

اهلا بكم فى عالم المدونات

اهلا بكم جميعا فى عالم المدونات نلتقى من كل شعوب الدنيا  نتشاور ونتحاور ونتبادل التجارب الحياتية ورحلاتنا عبر العالم الواسع الكبير فهل نحلق سويا فى سماء الله الصافية  ونتجاذب ذكرياتنا فى الحياة التى اصبحنا نشعر فيها باننا فى عالم واحد تتناغم اطيافه وشعوبه معا ليصنعوا الحياة